काठमाडौं । काठमाडौं महानगरपालिकाले सामुदायिक विद्यालयबाट ट्राफिक सचेतना कार्यक्रम थालनी गर्ने भएको छ । महानगरकी उपप्रमुख सुनिता डंगोलको कार्यकक्षमा उपत्यका ट्राफिक प्रहरी कार्यालयका प्रमुख एवम् प्रहरी नायव महानिरीक्षक मिरा चौधरीसहित अधिकारीको बैठकले यस्तो निर्णय गरेको हो ।
विद्यार्थीहरुलाई जीवनउपयोगी ज्ञान र सीप प्रदान गर्ने कार्यक्रममार्फत उनीहरुको चौतर्फी विकास गर्ने उद्देश्यले यो कार्यक्रम अगाडि बढाइरहेका उपप्रमुख डंगोलले बताइन् । ‘विद्यार्थीहरुले पाएको सीप र ज्ञानबाट परिवार र समाज पनि लाभान्वित हुने महानगरको अपेक्षा छ । विद्यार्थी सूचनाका संवाहक हुन् । उनीहरुबाट छिटै परिवर्तन ल्याउन सकिन्छ’ डंगोलले बताइन् ।
‘विद्यालयहरुमा सञ्चालन गरिने यसप्रकारको सचेतना कार्यक्रमबाट काठमाडौंको ट्राफिक व्यवस्थापनमा दीर्घकालीन सकारात्मक प्रभाव देखिनेछन्,’ चौधरीले भनिन् , ‘महानगरसँग नतिजामुलक सहकार्यको थालनी भएको छ ।’
सचेतना कार्यक्रमको पहिलो चरणमा सामुदायिक विद्यालयहरुमा कक्षा सञ्चालन हुनेछन् । शिक्षा विभागका प्रमुख रामप्रसाद सुवेदीका अनुसार प्रार्थना हुने समयमा सबैका लागि पहिलो कक्षा चलाइनेछ । त्यसपछि रुचि र उमेरका आधारमा ठूला कक्षाका विद्यार्थीलाई ट्राफिक स्वयंसेवकसम्बन्धी शिक्षा र ज्ञान दिइनेछ । यसरी सैद्धान्तिक कक्षा लिइसकेका विद्यार्थीहरुलाई स्वयमसेवकका रुपमा सडकमा प्रयोगात्मक सीप सिकाइनेछ ।
सामुदायिक विद्यालयबाट सुरु भएको कार्यक्रम दोस्रो चरणमा संस्थागत विद्यालयहरुमा विस्तार गरिने लक्ष्य राखिएको छ ।